Aparılmış laborator müayinələr nəticəsində Binəqədi rayonu, Novxanı yolu, 7-ci kilometr ünvanında fəaliyyət göstərən “Hikmət” MMC-də istehsal edilmiş və kağız qutulara qablaşdırılmış 1-ci növ xörək duzunun tərkibində yodun miqdarının normadan az, “Ekstra” xörək duzunun tərkibində isə yodun miqdarının normadan çox olduğu müəyyən edilmişdir.

Bununla əlaqədar, “Hikmət” MMC-də duz istehsalının qanunauyğunluğu ilə bağlı yoxlamaya başlanmış və müəssisənin anbarında olan 1-ci növ xörək duzundan və “Ekstra” xörək duzundan nümunə götürülərək laborator müayinəyə göndərilmişdir.

Müəssisənin anbarından götürülmüş nümunələrin laborator müayinəsi zamanı da 1-ci növ xörək duzunun tərkibində yodun miqdarının normadan az, “Ekstra” xörək duzunun tərkibində isə yodun miqdarının normadan çox olduğu təsdiqlənmişdir.

Bununla əlaqədar, Dövlət Xidməti tərəfindən normativ-texniki sənədlərin tələblərinə cavab verməyən duzların satışının dayandırılması və ticarət şəbəkəsindən geri qaytarılması barədə “Hikmət” MMC-yə icrası məcburi göstəriş verilmişdir.

Antiinhisar Siyasəti və İstehlakçıların Hüquqlarının Müdafiəsi Dövlət Xidməti istehlakçılara insanların sağlamlığında xüsusi əhəmiyyət kəsb edən xörək duzu alarkən diqqətli olmağı və “Hikmət” MMC-nin istehsalı olan duzları almamağı tövsiyə edir.