Bundan başqa, müəssisədə olan hazır məhsulların etiketlərindəki son istifadə tarixi əsasında onların saxlama müddəti araşdırılarkən, bu müddətin normativ-texniki sənədlərlə müəyyən edilmiş müddətlərdən artıq göstərildiyi aşkar olunmuş, bununla da “MAKO” kiçik müəssisəsi tərəfindən istehlakçıları çaşdırmaqla haqsız rəqabətə yol verilmişdir.

Müəssisədə aparılan yoxlama zamanı həmçinin, istehsal edilən çörəklərin qablaşdırılması üçün istifadə olunan xammal və materialların gigiyenik və uyğunluq sertifikatlarının olmadığı, məhsulun üzərinə vurulan etiketlərdə saxlanma şəraiti və müəssisənin ünvanı barədə məlumatların göstərilmədiyi aşkar edilmişdir.

Götürülmüş nümunələrin laborator müayinələrinin nəticəsinə əsasən, müəssisədə xammal kimi istifadə edilən çovdar səmənisində ekstraktın kütlə payı normadan az, “Borodinskiy” çovdar çörəyində isə nəmlik normadan artıq olmuşdur.

Qeyd olunanlarla əlaqədar, “Pəhriz” və “Dietik” çörəklərin istehsalının və anbarda olan 30 ton çovdar səmənisindən çörək istehsalı üçün istifadə edilməsinin dayandırılması, habelə “Borodinskiy” çovdar çörəyinin istehsalının normativ texniki sənədlərin tələblərinə uyğunlaşdırılması barədə “MAKO” kiçik müəssisəsinə göstəriş verilmişdir.

Antiinhisar Siyasəti və İstehlakçıların Hüquqlarının Müdafiəsi Dövlət Xidməti istehlakçılara “MAKO” kiçik müəssisəsinin istehsalı olan “MAKO” əmtəə nişanlı “Dietik”, “Pəhriz” və “Borodinskiy” çörəklərini almamağı tövsiyə edir.